ୟୁନେସ୍କୋ ଦ୍ଵାରା ୧୯୯୯ ମସିହାରେ ମାର୍ଚ୍ଚ ୨୧ ତାରିଖକୁ ବିଶ୍ଵ କବିତା ଦିବସ ଭାବରେ ଘୋଷଣା କରାଯିବା ପରେ ବିଶ୍ଵ ତମାମ ଏହି ଦିବସଟିକୁ ବିଶ୍ଵ କବିତା ଦିବସ ଭାବରେ ପାଳିତ ହୋଇଆସୁଛି l ନୟାଗଡ଼ର ବିଭିନ୍ନ ସାହିତ୍ୟ ଓ ସାଂସ୍କୃତିକ ଅନୁଷ୍ଠାନ ସମୂହ ଏହି ଦିବସଟିକୁ ନୟାଗଡ଼ର ଖେଳପଡିଆ ମୁକ୍ତାକାଶ ତଳେ ପାଳନ କରୁଥିଲେ l ଦୁଇ ହଜାର ବାଇଶି ମସିହାରେ ଅସୁସ୍ଥ ଥିବା ବିଶିଷ୍ଟ ସାହିତ୍ୟିକ ତଥା ପ୍ରବଚକ ପଣ୍ଡିତ ଚନ୍ଦ୍ରମଣି ପ୍ରଧାନଙ୍କ ମନକୁ ଉଶ୍ୱାସ ଦେବା ଉଦ୍ଦେଶ୍ୟରେ ତାଙ୍କ ବାସଭବନ “ଚନ୍ଦ୍ରକାନ୍ତି ନିଳୟ” ଇଟାମାଟି ଠାରେ ଆୟୋଜିତ ହୋଇଥିଲା ବିଶ୍ଵ କବିତା ଦିବସ l ଉକ୍ତ ଦିନ ସ୍ୱର୍ଗତ ଚନ୍ଦ୍ରମଣି ପ୍ରଧାନ ନିଜେ କାର୍ଯ୍ୟକ୍ରମରେ ଅଧ୍ୟକ୍ଷତା କରିଥଲେ l ତତ୍ ସହିତ ସେ ଅନୁରୋଧରଖି କହିଥିଲେ ମୋର ବର୍ତ୍ତମାନ ହେଉ ବା ଅବର୍ତ୍ତମାନରେ ପ୍ରତିବର୍ଷ ଚନ୍ଦ୍ରକାନ୍ତି ନିଳୟରେ ବିଶ୍ୱକବିତା ଦିବସ ପାଳନ କରିବାକୁ l
ନିଜ ସହଧର୍ମିଣୀ ବିଶିଷ୍ଟ ଶିକ୍ଷାବିତ୍ ତଥା ସୁସାହିତ୍ୟିକା ଡ.ସୁକାନ୍ତି ମହାନ୍ତି ଓ ପରିବାର ସଦସ୍ୟ/ସଦସ୍ୟାଙ୍କୁ କହିଥିଲେ ସବୁ ବର୍ଷ ଏହି ଦିବସ ଆୟୋଜନ କରିବାକୁ l ଦୁଇହଜାର ବାଇଶିରୁ ଆଜି ଯାଏଁ ଚାରିବର୍ଷ ହେଲା ବିଶ୍ୱ କବିତା ଦିବସ ଚନ୍ଦ୍ରକାନ୍ତି ନିଳୟ ପରିସରରେ ଆୟୋଜିତ ହୋଇ ଆସୁଛି l ଆଜିର ଦିବସରେ ବିଶିଷ୍ଟ ନାଟ୍ୟ ନିର୍ଦ୍ଦେଶକ ତଥା ସୁସାହିତ୍ୟିକ ନାଟ୍ୟଭୂଷଣ ଡ. ବିଜୟ କୁମାର ଚୌଧୁରୀ, ବିଶିଷ୍ଟ ସମାଜସେବୀ ପ୍ରମୋଦ ପଟ୍ଟନାୟକ, ନାଟ୍ୟକାର କମ୍ରେଡ ବିଶ୍ଵନାଥ ମହାପାତ୍ର ଓ ପରମ୍ପରା ସମ୍ପାଦକ ଡ. ନିର୍ମଳ ଶୁରଦେଓ ପ୍ରମୁଖ ଅତିଥି ଭାବରେ ଯୋଗଦେଇ ସାହିତ୍ୟର ଦିଗ ଓ ଆବଶ୍ୟକତା ଉପରେ ଆଲୋକପାତ କରିଥିଲେ l ନୟାଗଡ ଜିଲ୍ଲା ଲେଖକ ପରିଷଦ ସଭାପତି ପ୍ରଧାନୀ ବୃନ୍ଦାବନ ମହାପାତ୍ର ଅଧ୍ୟକ୍ଷତା କରିଥିବା ବେଳେ ସମ୍ପାଦକ କବି ଶେଖ୍ ଅବଦୁଲ୍ ଖାଲିକ୍ ସ୍ୱାଗତ ଭାଷଣ ଦେଇଥିଲେ l ଇତ୍ୟବସରରେ ପଚାଶରୁ ଉର୍ଦ୍ଧ୍ବ କବିତା ପାଠ କରାଯାଇଥିଲା l ପ୍ରାରମ୍ଭରେ ବିଶିଷ୍ଟ ସାହିତ୍ୟିକ, ପୂର୍ବତନ ପ୍ରଶାସକ ତଥା ଶ୍ରୀରାଧାର ସ୍ରଷ୍ଟା ସ୍ୱର୍ଗତ ରମାକାନ୍ତ ରଥ ଓ ସ୍ୱର୍ଗତ ସାଥୀ ଚନ୍ଦ୍ରମଣି ପ୍ରଧାନଙ୍କୁ ନୀରବ ପ୍ରାର୍ଥନାରେ ଶ୍ରଦ୍ଧାଞ୍ଜଳି ଦିଆଯାଇଥିଲା l ନୟାଗଡ଼ ଜିଲ୍ଲାରୁ ଅନେକ କବି କବୟିତ୍ରୀ ଏଥିରେ ଯୋଗଦେଇ ସ୍ୱରଚିତ କବିତା ପାଠ କରିଥିଲେ l କବୟିତ୍ରୀ ଅଧ୍ୟାପିକା ନୀଳିମା ନନ୍ଦ ଓ କବୟିତ୍ରୀ ହରପ୍ରିୟା ଦ୍ବିବେଦୀ କବିତା ସଂଯୋଜନା କରିଥିଲେ l କାର୍ଯ୍ୟକ୍ରମରେ କବି ଗୋପୀନାଥ ପରିଡ଼ା, ପ୍ରକାଶ ପଟ୍ଟନାୟକ ଓ ଗୋପୀନାଥ ସେଠୀ ସହଯୋଗ କରିଥିଲେ l ଶେଷରେ ବରିଷ୍ଠ କବୟିତ୍ରୀ ତଥା କାର୍ଯ୍ୟକ୍ରମର ଉଦ୍ୟୋକ୍ତା ଡ. ସୁକାନ୍ତି ମହାନ୍ତି ଧନ୍ୟବାଦ ଦେଇଥିଲେ l
